三 家鬼

    上次講完我搭lift，今日都係講返我屋企。

    我以前舊屋住寶達村，夜晚，我一家返曬房訓覺，我由自己房張上格床望出廳到，每晚都見到有個男人坐響梳化，大約天光前嘅時間，坐一陣就走。

    唔係好睇到佢著咩衫，因為佢其實係一個全黑嘅影咁樣，低住頭，坐響梳化尾。佢消失既時間唔係「呼」一聲飛左去果隻，係隨住個天開始光，果黑影就淡化。

    試過响梳化打機，一路無事無事，打完之後，起身執機熄電視去廁所，由廁所出黎果下，已經見到個影坐左響果到，而最慘係，我訓覺果個欖枕仲响張梳化到未拎，即係「佢」嘅隔離。

    果下幾屈機。

    我扮無野咁行過去啦，隻眼唔敢四圍望，又唔敢跑住去，仲要特登自言自語講下野，「呀，執左書包未呢」、「記得帶水壺勞作紙」等等。

    因為我由好細個就意識到，就算見到，都要扮見唔到，扮唔知。

    總之唔好比佢知你知。

    呢度都想提提巴絲各位，如果咁唔好彩比你見到佢，而你又比佢知道你見到佢，咁你地條channel就socalled接通左喇。有時佢要你見到，總有d理由嘅，接通左，咁當然進一步同你連上啦。

    所以，最好係唔聲唔聲扮見唔到，呢個位你地可以bookmark左去，記住。

    尤其係去郊野公園旅行，好多時一班細佬玩玩下，都會見到旁邊草叢無端端多左人，你見到又同隔離係咁講係咁形容，跟你出公園嘅機會就相當高喇，往後再同大家分享一個我同前女友响馬騮山BBQ嘅經歷。

    先講返家鬼。

    我唔知我老豆阿媽有無見到過梳化上嘅黑影。但係，老實講，佢又無真係點樣滋擾到我地，大家都不以為然。

    不過有次，都真係比佢嚇到hihi。

    我訓碌架床上格，有一晚，訓訓下，比d粵曲聲嘈醒左。

    果隻粵曲聲唔係唱歌唔係帝女花果隻，係好似夜晚粵語長片中做大戲果種聲，即係有問有答，有男有女，有鑼有鼓個隻。

    我擘大眼，又好似聽唔到。

    我一合埋眼，d聲就好鬼近。近到好似，係你頭後面到播咁。

    我再擘大眼，無聲喎。

    合埋眼，又有。

    無聲…有聲…寂靜…粵曲…寂靜…粵曲…。我就諗，唔係化，咪咁啦…。偷偷望向梳化果邊，唔見有嘢，諗住拎轉身，一嘢搵d被遮住自己，轉身果下，大鑊，見到書檯張凳到坐左對腳囉！

    係，一對腳嘅黑影坐左響張凳到，無上半身，但係見到兩隻腳連腳掌個輪廓，條條fing。

    我當堂成身郁唔到，嗌唔出聲，淨係隻眼珠可以左右咁望。

    D粵曲聲愈黎愈大，嚴格黎講呢次係我第一次俾「嘢」壓。

    我個身當時係打側嘅，面望住牆果邊，背脊就係碌架床上樓梯果個位，我覺得後面有「人」係度來回咁行，身材好高。

    要知道就算你係合埋左眼，如果有人係你床邊經過，你都係會意識到嘅，我當時嘅感覺就係咁，我轉唔到身擰唔到過去睇，但係好清楚知道，後面有個好高嘅人响到徘徊。

    小學生嘅我都知，呢個高度，一係成七呎人，一係凌空…。如是者，行左幾轉，佢就停左响床頭上樓梯果個位到，無郁過，唔知...係咪望住我卦。

    到我郁得返既時候，已經天光喇。

    頭先話嚴格黎講係我第一次嘅俾嘢壓經歷，因為我一直都當呢次係自己發夢就算，我永遠都想相信...家鬼，係靜態嘅。

    係無滋擾性嘅。

    呢個「男人」周不時會坐響果到，到我愈大個，我就愈少見到佢。

    唔知係...我見到既力量細左，

    定係，佢唔駛再成日出現…

    不得而知。

    

    



    本章完